DROPDOWN MENU

Thursday, February 26, 2015

10/2015 Old is Gold

AW MIN HRILH RAWH ZANIN NGEIAH


Kum tam tak a sur a sa, hlimna leh lungngaihna lo hmachhawn tawh ni mahsela ni tin hian danglam lo leh pangngai reng an neih chu beiseina thar a ni. Thil tha leh hlimawm beisei turin zingah tawngka leh chetze hmangin an infiam a, nunhlui bo mai tur an sawi thar leh fo thin a ni.


An theihna tla hniamin, an taksa te lo awngrawp telh telh mah sela a tur ve renga ngaiin an lungawi a, an beidawng ngai lo. Kal hmasa bik nih hrein an inhnawn fo thin a, kal hmasak erawh an tum ngai lo a, Pathian rorel danah lungawi taka awm mai chu an tum a ni. Tu leh fate lakah an vui ngai lo a, vui an duh a nih ve pawhin tudang bula sawi lovin, an tuar tlang thin a. Chu chu an inhnemna a ni. 

Mi dang zingah erawh an inthlahrung a, rimchhia leh hnawksak an ni ang tih hlauvin. Rualkawm leh nunhlui chanchin sawi hi an hlimna a ni a, hlimna dang leh ngainat zawng erawh an sawi kur zut thin a. Hriatthiampui loh chuan ninawm leh sawi ngai sawi nawn tlut tlut nih an hlawh fo thin a. Ngaithlatu an mamawh rualin hrethiamtu an duh a ni.

Nun harsatna leh nunkawng hi an lo dai tawh hnu a nih avangin a ngaithla duhtu hnenah chuan ui reng nei lovin thurawn hlu tak an pe thin a. An zir atangin a ni ngai lo a, an dai tawh leh an lo hmachhawn tawh zirlaibu hmanga ziah theih ngai loh tur chu. Panlai nun leh an inchhai dan vel sawi hi nuam an ti a. An nulat tlangval nunhlui chu tunlai khawvel zia nen a danglam tawh em avangin an lungleng zual thin. An ni pawh hian "Tawn leh ka nuam ngei aw, Rawllai ka Di te kha" tih an bang chuang lo a. "Di Hlui' sak hi an bang ngai hek lo, Mi zawng zawng hian lunglenna leh sawi tur nunhlui kan neih avangin. 

An di hlui te chuan Tu leh fa, khup thum hmu pawh lo nise, khawharna a thlen a,he khawvela awm ve ngai tawh lo tura Pialral lama khiang an awih thin avangin. An tuanna tlang leh mual chu a la pangngai reng a, khawharna tur tawk chu a la awm pawh a ni thei, nimahsela, an sulhnu chhui tur awm lovin a dahlau tawh a ni. An thinlunga riak reng tur leh reh ve thei ngai lo tur an vanglai chu ngai hian an rum vawng vawng thinin ka ring a ni. 

P.S (Ka nau thlalak hlui ka en a, ka en reng a. Tichuan he thlalak atanga ka ngaihtuahna awm chu ka han type leh mual mual a nih hi, khaw awmdan inthlak thleng tran hian min ti lungleng lawk tlat a. )

No comments:

Post a Comment